BELEN GOPEGUI
IDAZLEA

Txikitan, Gopegui (Madril, 1963) futbol estadio batetik gertu bizi zen. Seinalea telebistara iritsi aurretik ikasi zuen faltak eta golak bereizten, zutoinean jotako baloiak eragindako ui! oihuak eta geldiketa batek eragindakoak bereizten. Zuzenbidea ikasi zuen, epaiketa filmen bidez hartutako konbikzioarekin, baina bazekien idazteari ekin nahi ziola. Hogeita hamaika urte igaro dira lehen liburua argitaratu zuenetik; hamaika eleberri (La escala de los mapas, Lo real, El padre de Blancanieves, Quédate este día y esta noche conmigo, Existiríamos el mar, besteak beste), zenbait saiakera liburu, gidoiren bat, eta haur eta gazte literaturako liburu batzuk izan dira.

El balonazo idatzi zuenean liburutegiak bisitatu zituen baloiaren kontrolari buruzko liburuak eta entrenatzaileen memoriak irakurtzeko. Ipuin eta eleberri asko erosi eta maileguan hartu zituen, gehienak gazteei zuzenduak, eta David Mamet-i ikasi zion markagailua iraultzen den partida batean narrazio perfektu baterako elementu guztiak daudela. Oraindik ez daki Mametekin ados dagoen ala ez, baina uste du borroka bakoitzean, garaipenaren bila dabiltzan bi talderen arteko norgehiagoka bakoitzean, beharrezkoak diren istorioak daudela, adibidez, banakakoaren eta kolektiboaren arteko lotura ulertzeko.